城中鏡：陳李妮幫襯博愛針灸

亞姐冠軍出身嘅博愛醫院副主席Lily陳李妮最近迷上做針灸美容，事關佢原本想調理身體而幫襯博愛中醫針灸服務，做咗幾次後身體已漸入佳境。有次醫師主動問佢做唔做美容針灸，聲稱可以瘦面兼令皮膚緊緻。Lily一聽到可以變靚啲，梗係即刻試吓，結果只做咗三次，已經好滿意效果喎。

陳李妮（右）好滿意瘦面效果。旁為譚姜美珠。

早前Lily同博愛醫院主席Winnie譚姜美珠相約飯敍，一講起中醫嘅療效就停唔到口，因為Winnie嘅老公譚立仁都係知名中醫，Lily不時搵佢把吓脈。今年Lily做博愛轄下醫療服務委員會主席，主要睇住中醫同牙科服務，所以有機會就要試吓自家中醫服務，估唔到有意外驚喜。

中醫咁受歡迎，所以年底博愛將喺何文田開設第四間中醫教研中心，提供中醫同針灸服務，除咗惠及各區市民外，亦可畀中醫畢業生有多啲臨床實習機會，一舉兩得。