原民政事務局局長曾德成同原公務員事務局局長鄧國威被免職，震撼整個官場，其中曾德成被指未做好青年工作。正競逐全國青聯副主席嘅香港青年聯會前主席霍啟剛話，香港回歸後，商界同青年組織喺促進年輕人與內地交流合作方面已經做得唔少，但係流於表面，有「旅行團化」傾向，佢認為下一步嘅青年工作應該要做得深入啲。佢希望藉住明年奧運年，通過體育為年輕人做多啲嘢。

霍啟剛（右）遇上前輩藍鴻震，唔知有冇請藍爺教番兩招呢？

盧金榮（右）同白富鴻兩位菁英會新舊主席同場現身。

陳振彬

廣西百色市尋日舉行投資環境推介會，咁啱香港菁英會主席盧金榮、青年事務委員會前主席陳振彬同啟剛都喺度。啟剛話青年工作範圍很廣泛，下一步可以做得更加專業同深入，例如，除咗推薦投資環境外，可以考慮喺律師、媒體等唔同專業領域做進一步交流，兼且提供多啲港青實習機會，盧金榮亦表同意。

教育為先 民政為次

陳振彬就話青年工作細水長流，需要由教育同德育做起，早啲將正確嘅價值觀注入教學中，佢直言政府應拿出政治決心。

香港回歸後首任民政事務局局長藍鴻震都有到場，佢認為青年工作首要係教育，其次才是民政，看法與陳振彬不謀而合。

第一手消息請下載on.cc東網iPhone/iPad/Android/Windows Phone Apps