政壇：借貸新趨勢睇埋讀書成績
平時借錢係睇月入、有冇樓揸手同埋信貸紀錄，但未來借貸市場新趨勢係，要睇埋你讀書時張成績表。話說，由一班Google前數據科學家搞出嚟嘅美國網上借貸平台Upstart，要求申請者講明讀過邊間學校、讀邊科、公開試考成點、連大學學分（GPA）都要知，用嚟評估申請人嘅搵錢潛力。
龍沛智
冼國林
咪以為名校畢業或者讀到博士實有着數，平台創辦人Dave Girouard話會睇埋行業人手需求同前景。話之你哈佛畢業、做緊律師定乜，分分鐘唔夠唔愁無工開嘅護士可以借咁多。呢條橋連著名對沖基金經理洛布都Buy，今個月先大手注資咗2.73億元。
本地薑又點睇？本港網上借貸平台WeLand.hk嘅CEO、Simon龍沛智話「都有用嘅」。佢話內地業務嚟講，申請人出身好嘅學校，還款紀錄都好啲；喺香港，申請人若肯向佢哋交學歷或社交媒體資料會有利息優惠添！但傳統借貸業似乎唔Buy，第一信用主席冼國林直頭話Upstart呢招無用兼多餘，仲話私隱專員公署實反對。
