政壇：搞搞政：阿人九西爭位 隨時攬住泛民輸凸
因應人口分布改變，明年立法會選舉九龍西直選增加一席，俗語話「多個香爐多隻鬼」，新增呢個議席自然引來多方爭逐。按現時形勢，九龍西五個立會議席，三個屬泛民（獨立黃毓民、公文袋、白鴿黨），兩個屬建制（建仔、經民聯），泛民連同民協，四個黨派共取得十四萬三千票，建制派只得八萬二千票，比例係六成四對三成六，算係泛民咁多個選區中，比例最懸殊嘅一區。故當政府宣布九龍西加多一席，好容易就聯想到，係由今屆選舉僅輸四千票嘅民協攞到最後一席。
設計圖片及對白
政圈消息話，泛民同建制黨派都對呢個新增議席蠢蠢欲動。建制派中，建仔有傳想派多一隊出戰，今屆被勸退嘅工聯會亦有意重返戰場，富貴黨亦傳有意參選。至於泛民方面，有工黨中人話立黨之時，曾經講過希望每個立會選區都有一席，依家佢哋喺港島、新界東同新界西有議席，加上工黨都打算派人出選九龍西嘅區議會選區，相信到立會選舉時，都有地區樁腳幫手。
捐款醜聞纏身勢遭狙擊
據聞工黨其中一個可以考慮出戰九龍西嘅人選就係李卓人（阿人），皆因佢有知名度，轉區相對難度不大，而佢哋亦試過今屆空降張超雄去新界東，最終勝選，所以都唔係冇機會喎。但以總票數計，泛民攞到四席係正常，五席就真係太進取。如果泛民「貪勝不知輸」，最終可能兩敗俱傷分薄票源，甚至攬住一齊死，最後隨時益咗建制派，到時就喊都無謂。
加上工黨面對收取壹傳媒集團前主席黎智英捐款醜聞拖累，到時一定畀建制派狙擊，一個唔覺意，影響晒成個泛民都有之。
