政壇：遲報鉛水一舊雲遭惡搞
白鴿黨嘅立法會議員「一舊雲」黃碧雲揭發啟晴邨食水含鉛超標，事件引起社會關注。不過，早前就有報道質疑一舊雲明明五月初已經知道「鉛水」事件，但就拖延到七月先公布，一舊雲嘅前黨友新聞統籌專員馮煒光日前仲因為質疑一舊雲，而同前黨友喺網上展開罵戰。雖然一舊雲日前已經澄清並冇拖延公布，但仍然畀人掛橫額惡搞，佢話已經報警處理喇！
街頭出現一幅寸黃碧雲延遲公布鉛水化驗結果嘅橫額。（互聯網圖片）
話說麗晶花園街頭出現咗一幅印有一舊雲樣貌嘅橫額，仲寫有「五月初驗出鉛水，七月五日公佈，不負眾望」字眼，擺明又係想寸一舊雲延遲公布。一舊雲就將嗰幅橫額嘅相放上社交網站，仲再次貼文解釋佢係五月七日先收到水辦拎去化驗，做化驗都要反覆驗證先公布，批評有人歪曲事實、不斷抹黑，仲盜用佢嘅頭像咁話。佢仲叫有心嘅「正義之士」幫佢拆走違規抹黑嘅橫額，拆走割爛又得，拎去回收都得。但點解一舊雲自己唔拿拿聲去拆呢？
