楊章桂芝望新沙士早日退卻，盡快復辦韓國團。
南韓中東呼吸綜合症（新沙士）轉眼爆發個多月，當地遊客幾近絕迹，酒店減價自救都無乜起色。但隨着近月疫情漸受控制，新華旅遊董事總經理Cindy楊章桂芝話，有信心紅色旅遊警示快將解除，正計劃八月初「復團」，但行程路線會先避開早前疫情較嚴重嘅首爾，轉攻釜山同濟州。不過，疫情反覆多變，八月係咪復到團，好睇天意。
新沙士重創遊韓信心，撞啱暑假旺季，停辦韓國團，對旅行社生意打擊大。Cindy話好在日圓低水，唔少旅客改往東京、大阪、沖繩等地，客量未致流失，但辦少咗個幾月嘅首爾團，多少有損失。佢留意到釜山同濟州嘅疫情，未受太大牽連，近日密密同當地旅行社、酒店聯絡，希望一旦成功復團，會以優惠價吸引港人先去呢兩個地方，慢慢重建信心。
第一手消息請下載on.cc東網
