話說政府喺前日宣布免去原民政事務局局長曾德成同公務員事務局局長鄧國威嘅職務,令外界為之震驚。不過,有讀者就發現銅鑼灣一間名人食堂內嘅一幅大型素描畫作竟洞悉先機!讀者報料話,嗰間食肆一幅七呎長畫繪有三司十二局官員,當中疑似表達有兩個局長下台。

喺畫作中,除咗曾德成同鄧國威係拖篋、貌似執包袱走人之外,其他司局長都係輕裝上陣。

睇番嗰幅畫,三司十二局問責官員個個畫得栩栩如生,內容係眾高官等緊去嗰間餐廳嘅巴士,而除咗曾德成同鄧國威係拖篋、貌似執包袱走人外,其他人都係輕裝上陣,而呢幅畫作所註日期為今年五月。

報料讀者就認為此畫內有玄機,清楚表達兩名局長將會下台,而且五月中已經知道,又話「上天早有定數」。食店東主就話,畫作係一位年長熟客送贈,呢位熟客已多次送畫畀佢哋,但就唔肯透露呢位熟客嘅身份!

第一手消息請下載on.cc東網iPhone/iPad/Android/Windows Phone Apps