政壇：健波未掌財會先戴頭盔
由於泛民主派議員動輒「拉布」，搞到立法會財務委員會近年不時加開會議，好似上星期就因應政府要求加會長達二十八小時，主席唔單止要坐定定，仲要應付泛民「拉布」，真係少啲精力都唔得。剛卸任主席嘅Tommy張宇人之前預告好大機會唔連任，據聞建制派亦放棄由金融界議員吳亮星輪任下年度主席，所以本身係副主席嘅保險界議員陳健波最大機會「升呢」做主席。不過，陳健波話如果唔修改議事規則三十七（a），任何人做主席都係艱難嘅，真係未上場就戴定頭盔。
設計圖片及對白
Tommy同陳健波尋日開記者會，回顧財委會喺一四至一五年立法年度工作。被視為下年度接掌財委會嘅大熱人選陳健波，被問到會否角逐主席時話，如果唔修改議事規則三十七（a），任何人做主席都好艱難同吃力不討好，仲大讚Tommy開咗百幾個鐘頭會議都冇頭暈身㷫，證明佢好有能力。
陳健波又透露，建制派有人叫佢做財委會主席，但依家時間尚早，十月時建制派會再開會商討，重申自己唔會主動爭主席嚟做。
張宇人言退 猛晒政績
另一方面，Tommy之前揚言好大機會唔連任財委會主席，惹來外界猜測佢係想以退為進。佢尋日講明下屆唔會做主席，希望大家唔好再猜疑佢係以進為退或以退為進，期望下屆主席可以做得好過佢好多。雖然係咁，佢亦不忘晒吓自己喺過去一年政績，包括開咗八十五次會，時數長達大約一百八十小時，無論係次數同時間都成為歷年之冠；其中七十四次會係審議政府撥款建議，大約用咗一百四十五小時，審議咗一百項財務建議，批准當中嘅九十八項，包括工務工程、人事編制同民生項目等。
