平機會製造不平 周一鑊過街老鼠
明星偶像有粉絲團唔出奇，奇就奇在連平機會都有。不過咁，此粉絲團唔同彼粉絲團，純粹為咗監察平機會弊端而成立。一個公營機構醜聞多到咁嘅地步，連市民都睇唔過眼，都算開創先河咯。
係咁嘅，人稱「廢嶽」嘅平機會主席周一嶽向立法會政制事務委員會匯報工作，結果場外罵聲不絕，場內炮聲隆隆。先講場外，「平機會弊端關注組」連同其他示威人士舉橫額叫口號，批評周一鑊用人唯親、偏袒同志團體、浪費公帑、管理混亂，要求佢落台。場內立法會議員直斥周一鑊高調撐同志團體，排斥異己，係史上最受爭議嘅平機會主席，連帶平機會嘅公信力亦備受質疑，簡直係佗衰家咁話。
周一鑊之所以搞到人人喊打，歸根究柢，咪就係因為佢衰格無能又無事生非囉。淨係講用人唯親呢一筆，周一鑊自把自為僭建一個月薪十六萬元嘅營運總裁職位，搞到人事架構不斷膨脹，肥上瘦下，擺明益自己友喇。咁仲唔止，為咗進一步獨攬大權，意見相左嘅員工通通冇得留低，搞到員工流失嚴重，好似前總平等機會主任束健銘咁，唔獲續約不特止，仲要打官司追討約滿酬金，係咪離譜吖？
仲有呀，平機會現有辦事處被業主大幅加租，周一鑊一味攤大手板問政府攞錢不特止，仲嫌家陣嘅辦事處唔夠闊落，係都要租多一個辦事處，每年淨係租金嘅額外開支就高達六百四十多萬元，全部由納稅人埋單。難為佢仲唔心足，再次提出購置永久辦事處，仲好意思話平機會一直堅守量入為出嘅理財原則喎，有冇再厚顏啲吖？
講到最受爭議咯喎，點都要提異性及同性關係「事實婚姻」納入保障範圍呢一筆嘞。連周一鑊自己都承認，咁做係超出平機會法定職能權限，但又狡辯唔可以對歧視問題視而不見，乜都係佢講晒喇。正如立法會議員話齋，周一鑊一味為同志團體發聲，成個代言人咁款，反而對內地旅客受到歧視不聞不問，擺明大細超，難怪平機會公信力跌到趴地喇。
真係諗極唔明，周一鑊以前做官禍港殃民，早就有口皆「悲」，偏偏港府千揀萬揀，揀着呢條廢柴執掌平機會，結果唔單止將「每周一鑊」嘅精神帶入平機會，仲發揚光大添，搞到民怨沸騰，唔衰攞嚟衰。唔通港府嫌社會仲未夠亂，要衰多兩錢重先至安樂咩？叮！
