城中鏡：任大炮偉論樓市靠離婚

任大炮話每當有人離婚，家庭會分裂，咁就意味住需要更多嘅住屋。中國離婚率年年上升，依家每年有成二十萬到三十萬個家庭離婚，所以住屋好有需求喎。明白晒，有網民仲即刻話「愛國就辦離婚」。

學習完任大炮嘅講話後，大家再嚟見識多樣嘢，就係上車唔一定靠富爸爸，靠大媽一樣得。話說哈爾濱中北春城小區有個廣場，一班大媽好鍾意喺度跳廣場舞，不過大媽嗰種熱鬧法，唔係一般人支持得住。有業主放盤，經紀話單位喺正校園區一定搶手，開一百三十二萬人仔實無問題。點知，一知日日有大媽跳廣場舞，班睇樓客即閃，就算業主割價到一百二十萬都無人吼。嗱，咁搞法，大家仲唔係易啲上車。