（設計圖片及對白）
香港工業總會搵咗舊年五月退休前休假嘅時任律政司政務專員Arthur何健華，喺下月二十四日加入工總，接替九月離職嘅現任總裁Linda蘇家碧。據聞政府批准Arthur打呢份工，但對佢處理涉及退休前負責嘅相關政策事務有所限制。
同係前高官出身嘅Linda喺工總只做咗三年幾，今年三月傳出佢畀錯漏百出嘅港鐵高薪挖角，將喺九月十六日過檔港鐵搵真銀，出任年薪高達三百四十八萬元嘅公司事務總監。其實，工總一度對前高官怕怕，但幾經掙扎，都係「情迷」前高官。
曾任政制局或需避嫌
做咗公務員三十七年嘅Arthur一二年由政制局轉任律政司，一四年五月退休，扣除離任前休假，查實到今年五月先至正式退休。所以雖然政府基本上批准佢出任工總總裁，但例牌對佢處理涉及退休前負責嘅工作設限。律政司政務專員工作只係處理一般行政工作，因此講緊嘅應該係三年幾前喺政制局嘅工作。
Arthur喺政制局任內處理嘅多數係政治問題，包括上屆特首選舉，照計同工業界組成嘅工總業務冇乜衝突。不過，咁啱後年將舉行特首選舉，政改被否決後，一切打回原形，特首都係由一千二百名選委投票產生，而工總唔少成員都曾經係選委，來屆好大機會都會繼續爭取做選委，所以Arthur都係避談選舉好啲嘞！
第一手消息請下載on.cc東網
