政壇：虎哥遇雷軍迷失四粒鐘
小米副總裁巴拉（Hugo Barra）早排話，部部手機都有角位、中間都有個Home Button o架啦。巴拉咁講，大家何止睇到小米冇抄蘋果，仲睇到佢幾咁愛護小米，都未計佢起埋「虎哥」呢個中文朵嚟投入小米家庭。不過，佢前年由Google跳槽去小米時都幾爆，究竟點扯得埋？原來就係佢同雷軍初遇嗰四粒鐘，虎哥最近講番，仲話感覺好Surreal（超現實）喎。
原來「虎哥」（右）同雷軍（左）溝通，全憑小米總裁林斌做即場翻譯。（資料圖片）
話說虎哥自爆，一二年尾佢同雷軍喺北京初見面，傾足四粒鐘，天南地北，由手機到互聯網、又由巴西講到車。虎哥仲即場覺得雷軍係屬於「Android之父」Andy Rubin嘅級數。
咪住！虎哥係英文人，雷軍最耍家英文金句係「Are you Ok」，佢哋咁深入嘅溝通係……係靠小米總裁林斌即場翻譯，仲好似係逐句嚟。減晒啲飲飲食食同逐句譯，啲肉可能得番……難怪虎哥話呢四粒鐘過得快似十分鐘，仲覺Surreal。原來係「迷失北京」，即係「Lost In Translation」囉！
