劉皇發坐最前排睇實阿仔劉業強主持會議。
做開新界鄉議局主席嘅立法會議員劉皇發今年唔再角逐主席之位後，佢嘅大仔Kenneth劉業強就順理成章子承父業，喺無競爭情況下自動當選主席。Kenneth尋日首次以主席身份主持鄉議局大會兼執委會，過程尚算順利，而喺政改之後甚少露面嘅發叔都有撐住拐杖現身，唔知佢係垂簾聽政吖，定係支持阿仔呢？
Kenneth喺會上匯報鄉議局大樓管理情況，佢話大樓五月靠出租場地有四十萬八千元收入，但支出就高達四十七萬八千元，超支七萬元，出租率唔算理想。
不過，睇得出Kenneth努力經營盤數，事關四月份鄉議局勁蝕二十多萬元，去到五月超支縮窄到七萬元，明顯佢落過苦功，加上六月份場地出租率升咗好多，好似大劇院由四成升至六成八，相信收支平衡指日可待。如果Kenneth一上場搞好盤數，相信有助日後管理鄉議局。
第一手消息請下載on.cc東網
