政壇：三師新舊會長 廟街義唱試咪
香港牙醫學會會長Sigmund梁世民近日就搵埋醫學會前會長謝鴻興、律師會前會長王桂壎同建築師學會前會長鄺心怡，九月九日晚上將喺廟街開咪，籌款協助露宿者。廟街出名臥虎藏龍，踩場賣唱，幾位新舊會長戰戰兢兢，日前走去廟街試咪做準備，順便打個招呼。
謝鴻興（前左起）、王桂壎、梁世民同鄺心怡約埋去廟街試咪，為街頭義唱籌款做準備。（受訪者提供圖片）
試咪當晚，檔主爽快借出音響配合，Sigmund話估唔到廟街人好友善，彼此交流歌藝，打成一片。有檔主們知道佢哋為慈善義唱，仲樂意租檔位畀佢哋唱一晚。
首次喺街頭賣唱，謝鴻興坦言好大壓力：「咁多對眼望住你，唱得唔好，唔夠大聲，實被人掟番茄！」Sigmund就話，為免曲高和寡，仲專登揀啲耳熟能詳嘅金曲，等街坊聽得更投入。
當晚不設賣飛，路過嘅街坊可以隨緣樂助。但為免擾人清夢，Sigmund打算唱到夜晚十點半收檔，預計成晚可籌幾萬元，雖然金額唔算好多，但足夠買啲食物為露宿者打吓氣喎。
