政壇：政改甩晒轆 曾鈺成評分大跌
由於建制派喺立法會表決政改方案時「甩轆」集體離場，引發民望危機。港大民意研究計劃尋日公布政改表決後首個「十大議員」民意調查，本身係建仔嘅立法會主席曾鈺成，雖然以六十一點三分獲得第一名，但評分就大減二點一分，跌幅係上榜議員之冠，未知係咪同佢參與建制派WhatsApp群組「通水教路」有失主席中立角色，同埋發表種族歧視言論有關。不過，曾鈺成已承認參與群組令政改「甩轆」更加添煩添亂。
（設計圖片及對白）
大舊跌出十大榜外
調查喺本月訪問咗約二千名市民，按市民熟悉度選出十大議員，再進行評分。曾鈺成自一三年四月以嚟，已連續十次蟬聯同類調查「冠軍」，但評分就比上次下跌二點一分，為其民望響起警號。
否決政改方案嘅人民力量「大舊」陳偉業同長毛，評分都分別下跌兩分同一點五分，而工黨李卓人評分亦下跌一點二分，排名仲下跌兩位排第八，至於長毛就包尾，大舊仲被踢出榜外。至於白鴿黨劉慧卿則輕微下跌零點一分，排名第六位。
政改方案雖被否決，但亦有議員評分逆市上升，升得最勁係黃毓民，爆升三點一分，其次係新民黨葉劉淑儀升咗兩分，未知係咪同佢喺建制派「甩轆」集體離場後上電台節目喊住道歉，因而獲得市民同情原諒有關呢？而葉劉嘅黨友田北辰都有零點八分進帳，排名第三位。至於佢阿哥田北俊，就由上次榜上無名到今次得五十五點三分排第二名。
正所謂「分數嘅嘢有升有跌」，港大民意研究計劃總監鍾庭耀話，躋身「十大議員」先決條件係巿民熟悉程度，再按支持度排名，或者有議員支持度好高，但熟悉度唔夠而無緣入榜喎。
