書展丁財雖兩旺 文化沙漠難栽花

今年已經係第廿六屆書展，氣氛一年熱鬧過一年，入場人次一年高過一年，由最初嘅二十餘萬激增至去年嘅一百零一萬，預計今年會再次打破紀錄。咁仲唔止，書展規模愈來愈大，淨係今屆參展嘅書商已經有五百八十多間，簡直花多眼亂。港人亦愈來愈捨得使錢，去年人均消費高達近千元，證明書展旺丁又旺財。

睇完上面嘅數據，大家一定覺得香港人讀書風氣濃厚，書卷味爆燈。可惜吖，眼見未為真，睇吓消費者買乜嘢書居多先講喇。書商透露，暫時最受歡迎嘅係本土題材及語言類書籍，前者可能同社會氣氛有關，後者主要為咗應付考試，吸引好多家長及學生購買。另外，明星寫真、旅遊天書等消閒書籍亦頗受歡迎，反觀嚴肅嘅文學、中外名著就乏人問津。

呢個結果一啲都唔令人意外，貿發局話就話舉辦書展嘅目的係推廣閱讀風氣，提升大眾對閱讀嘅興趣，講就好聽，實際上醉翁之意不在酒，淨係睇吓傳媒每年報道書展嘅焦點，例牌集中喺一班博上位嘅性感o靚模身上，就知道同推廣閱讀風氣大纜扯唔埋喇。今年仲因為一位六歲妹妹寫真集引發軒然大波，成為輿論話題，到底仲有幾多人關心閱讀，唔使問都知喇。

其實，香港向來有文化沙漠之稱，有機構做過調查，只有四成港人有閱讀習慣，過去半年平均閱讀一點七本書咁大把。對比韓國人每年平均閱讀十一本書、日本人閱讀四十本書，簡直有天淵之別。至於睇得最多書嘅係小學生，事關唔少學校揠苗助長，強迫學生一個學期必須睇完幾十本書，搞到好多學生睇書只為交數，失去閱讀嘅真正意義，你話香港係咪畸形吖？

冇計喇，香港係功利社會，認為從商先會發達，做醫生、律師先有「錢途」，又有幾多人重視文學歷史吖？再者家陣科技先進，幾乎個個年輕人都係低頭族，一味掛住玩手機，仲邊有人會攞住本書喺手喎。最好笑嘅係，前朝貪曾不學無術，偏偏學人附庸風雅，結果搞到西九文化區超支延誤不斷，到依家仲係爛地一塊，世界級文化區就冇嘞，世界級醜聞就有之，叮！