城中鏡：邱李茂琪為酒行勻杜拜
溥儀眼鏡行政總裁邱子傑早前偕同太太Margaret邱李茂琪及子女杜拜旅遊，適逢杜拜齋月，令熱愛杯中物嘅Margaret，喺杜拜上演一幕尋酒記，為一杯酒尋遍杜拜。
邱李茂琪話習慣每日都會飲少少酒。
話說佢哋抵達杜拜首天，先知道當地正值齋月，Margaret笑言難怪街上嘅遊人特別少，佢話：「喺呢段時間，公共場合都唔煙唔酒，我簡直癲咗，因為我習慣每日會飲少少酒，第一日去到攰就算，第二日好想飲杯啤酒，周圍打聽邊度有得飲，又上網搜尋，終於畀我搵到個地方可以飲酒，但去到原來唔畀着短褲入場，咪專登返酒店換衫再去過。」為咗淺嘗杯中物，Margaret可以不顧一切。
一家人仲首次乘坐郵輪，暢遊意大利同西班牙，喺西班牙期間亦發生趣事，有日邱子傑帶同子女喺當地踩單車，誤打誤撞入咗一個天體沙灘，Margaret話當日佢唔在場，初時仲擔心會對只有十二歲嘅囡囡有壞影響，佢話：「我仲驚個女會有陰影，點知佢同我講，學校一早有教性知識。」
