政壇：搞搞政：葉劉亂槍狂轟多個政策局
身兼行政會議成員嘅新民黨立法會議員葉劉淑儀將過去一年寫嘅文章結集成書，仲搞咗個新書分享會，事有巧合，佢喺分享會中猶如亂槍掃射般，炮轟多個政策局負責嘅政策範疇。
葉劉喺分享會中一開始就話唔係想針對財爺「鬍鬚曾」曾俊華，認為對方只係承傳前人嘅做法，用審慎理財嘅口號，佢又話今年財政預算案有提到競爭力，但都只係講自由經濟，其實競爭力包括好多方面，暗批鬍鬚曾無宏觀嘅經濟視野，只停留喺殖民地思維。
斥西九M+資金投放少
講到興起，佢把矛頭轉向多個政策範疇，先指政府產業政策失敗，好似西九M+咁，地方又細、資金又投放得唔夠，直言「文化唔係生長喺紅毛泥石屎地，要畀佢有機地成長，依家政府只係投放二十億，一幅名畫都十億」。
跟住講到郵輪碼頭，佢認為香港唔可能成為郵輪母港，又指地中海區域做到唔代表香港都做到，事關香港年年都有颱風，每年至少幾個月唔能夠畀郵輪停泊，質疑負責郵輪碼頭嘅官員根本冇搭過郵輪，如果唔係冇可能唔知道，之不過依家唔起都起咗，真係「喊都無謂」，佢建議不如諗下點做好啲仲實際。佢其後再提到，機場北會搞大型購物區，據稱三跑計劃亦有購物區，認為係過度供應，唔通想下一代仔女個個都賣手袋同鞋？
話時話，葉劉身為「雙料議員」，喺香港政圈踏入「後政改」時火氣十足批評多項政府施政，究竟係咪意有所指，或想傳遞啲乜訊息，留待大家自行判斷嘞！
