政壇：蔣麗芸夫婦被批「鉛兇」
近期鉛水風波鬧得滿城風雨，其中一個矛頭指向涉事屋邨總承建商母公司中國建築國際集團，而建仔嘅立法會議員阿Ann蔣麗芸嘅老公梁海明，被發現係中國建築國際集團嘅獨立非執行董事，網民紛紛發炮批評，搞到阿Ann都要代夫解畫，近日有關批評更延伸到現實世界，網上最近流傳建仔多個支部嘅辦事處外，被掛上印有阿Ann同梁海明肖像嘅橫額，更印有「鉛兇」、「置居民生死不顧」等字眼。
網上流傳建仔多個支部辦事處外，被掛上印有蔣麗芸同梁海明肖像嘅橫額，更印有「鉛兇」字眼。（互聯網圖片）
話係對手搞事
阿Ann接受查詢時反駁指，懸掛有關橫額嘅人士屬於毀謗，舉例指明明老公梁海明係獨立非執行董事，橫額就寫佢執行董事，質疑有人趁機混淆視聽。佢其後更指出，懸掛該款橫額嘅人唔係普通市民，直言會就今次事件交畀律師研究處理，佢話︰「邊個咁得閒又印又掛呢？唔使錢咩？仲要由九龍掛到新界都有，唔係對手係邊個先？」
