政壇：廖成利歸隱田園摘粟米
唔少港人都會嫌生活太急促想放慢落嚟，有人甚至歸隱田園。民協主席「老虎仔」廖成利尋日喺社交網站上載咗幾張相，見到佢又做運動、又落田割粟米，真係梳乎，唔通佢已經退休？
廖成利落田收割粟米兼做運動。（互聯網圖片）
老虎仔話，原來佢兩年前已經搬咗去錦上路菜園新村住，因此同當年爭取保留菜園村嘅村民高春香熟稔，自此佢就經常帶埋太太同朋友一齊做運動、一齊去田園摘菜嘞！老虎仔又話，佢尋日做嘅兩個體能動作係平板同呼吸吐納，呢兩個動作就算係年輕人都未必做得耐，睇嚟佢嘅體能都唔錯喎。除此之外，老虎仔對於三餐亦有一套心得，就係「早餐如皇帝，午餐如平民，晚餐如乞丐」，即係早餐最豐富，晚餐最清淡。
