環保署益自己友 高官翻閹何其多

話說環保署上個月以超過十萬元月薪，新增一個為期六個月嘅「社區關係總監」臨時職位，結果由正退休前休假嘅前助理署長陳英儂雀屏中選。最奇怪嘅係，署方二月底刊登招聘廣告，陳英儂第二個月就開始休假，期間可以支取助理署長月薪逾十五萬元，加埋新工嘅十萬元，每個月二十五萬元袋袋平安。高官退而不休，繼續發揮「餘熱」，唔通咁就係所謂嘅「環保」？

更耐人尋味嘅係，按照以往慣例，社區關係組嘅阿頭一般由首席環保主任出任，家陣署方突然開設非公務員職位，如果話唔係益自己友，三歲細路都唔信喇。正如立法會議員話齋，環保署高薪翻閹自己人，加上時間又咁巧合，擺明係刻意安排，度身訂造，有利益輸送同私相授受之嫌疑。

冇錯嘞，港府招聘黑箱作業，圍威喂閉門一家親，市民早就見怪不怪咯。最經典係食環署，年前被踢爆一次過翻閹二十幾個退休公務員，大部分冇經過公開招聘。最誇張係嗰位前助理署長，兩年合約夾埋淨𢭃二百五十萬元，簡直係錦上添花，喜上加喜。

本來呢，能者居之，只要有本事真正做到嘢，任用退休公務員未嘗不可，弊在政府部門用人往往不問能力，只問親疏，邊個氹得長官開心，邊個就有得留低，搞到擦鞋文化盛行，官場烏煙瘴氣。之前有消防處前線人員踢爆，內部聘請救護學校助理教官，明明要求五年資歷，點知因為有人同高層熟落，唔夠資歷都可以獲選。正如古人所講，德不稱其任，其禍必酷；能不勝其位，其殃必大。消防處用人唯親，因人設位，有乜法子唔亂象叢生，醜聞百出吖。

當然喇，講到翻閹自己友，公營機構更係家常便飯。西九文化區、私隱專員公署、平機會……幾乎清一色由退休高官揸fit，淪為佢哋嘅俱樂部。特別係平機會，港府好揀唔揀，揀着前食衞局局長周一嶽呢塊廢電池，佢食嘢唔做嘢，做嘢打爛嘢，上任後搞到爭議多多，滿城風雨，你話港府係咪唔衰攞嚟衰吖。

黃台之瓜，何堪再摘。港府施政混亂，民望已經夠低殘，再加埋呢班過氣庸官添煩添亂，想唔出事都幾難，叮！