城中鏡：紙婚紗夠韌力有睇頭

爭輸男友紙巾可以用嚟抹眼淚，爭贏咗時一樣可以用嚟做婚紗。紙巾商維達真係整咗件「紙婚紗」，仲趁尋日發布業績時，同場加映埋全港首個「紙婚紗」真人Show。維達主席李朝旺仲保證「紙婚紗」夠韌力，濕水都唔驚爛。

紙婚紗嘅物料係特別配方，堅韌又不透汗。

呢件「紙婚紗」製作要三個星期，仲要度身訂造。親手摸過，原來中間加咗層裡，連着住嘅Model姐姐都話件「紙婚紗」輕得嚟又唔刮身。

維達舊年出過「紙婚紗」小模型，今次出件真人着得嘅，聽講內地大賣場商家爭住要維達去Show添！會唔會喺香港落區展示？李主席話要睇吓先喎。「紙婚紗」現屬非賣品，但李主席話「若作慈善用途，我哋好願意」。