城中鏡：英作家分享讀門秘方
話說近年嘅書展，上海灘創辦人鄧永鏘爵士都會邀請英國作家來港演講，推廣英國文化。今年佢就搵嚟英國前首相戴卓爾夫人女兒Carol Thatcher、艾倫狄波頓同Simon Sebag Montefiore，尋日仲安排同傳媒見面。一班作者被問及會唔會上網用社交媒體，唔知係咪唔想倒自己米，佢哋聲言唔多想用，叫人買番實體書喎。
鄧永鏘（右二）今年邀請咗Simon Sebag Montefiore（左一）、艾倫狄波頓（左二）同Carol Thatcher（右一）嚟香港書展分享。
丁新豹話退休後仲忙過返工，要去旅行休息吓。（資料圖片）
艾倫狄波頓話社交媒體知道點樣令人感到滿足，好容易令人上癮，但認為人類進化嘅腦袋唔係用嚟適應社交媒體，就好似腦袋唔係用嚟處理色情、糖、鹽等，認為呢啲係不公平刺激（unfair stimulus）。
Carol就話有次搭飛機見到一個小朋友，一手攞住平板閱讀器，一手攞住小說，覺得科技最影響小朋友。依家有唔少人用手機或電郵聯絡，只會打縮寫，好少寫完整句子，佢希望可推廣多寫完整句子。
丁新豹自認西關大少
Simon認為人類最深層次感覺就係想被愛，所以社交媒體係無可抗拒，都擔心啲人只上網唔讀書。咁點樣抗拒上網，佢自己每日喺寫作完成後，只會花一小時上網，已經覺得係浪費時間（Time-wasteful）。
今年有份寫書嘅歷史博物館前總館長丁新豹尋日亦有出席講座，佢自爆喺廣州出世，可以話係「西關大少」，但就「落難」來港。讀書時佢生長喺「聯合國」學校，同學有來自葡萄牙、英國以至南美洲國家。自從退休後，佢話仲忙過返工，足足寫咗八本書，雖然依家研究緊街道命名史，但就唔打算出書住，諗住去旅行休息吓先。
