政壇：經民聯內憂外患 隨時散
喺建制派陣營眾多板塊中，依家喺立法會內手握七票嘅經民聯，可以話係功能界別大黨，但有商界中人分析，經民聯來屆立法會面對多個危機，要逐一化解先可以穩保地位，否則隨時出現骨牌效應「冧檔」。
設計圖片及對白
逐一分析經民聯七名議員有乜危機。先講商界（一）香港總商會代表林健鋒，自從佢喺建制派政改表決世紀甩轆事件後，唔止形象失分，領導能力亦備受質疑。有商界中人預料，佢喺總商會地位將受動搖，加上佢做足三屆議員，被換走機會大增。話雖如此，只要經民聯成功搵人頂替佢，總商會都未必啃唔落。
第二大隱憂來自鄉議局代表劉皇發，發叔年事已高，鄉議局主席已由其子劉業強「世襲」，雖然劉業強係經民聯成員，但佢係咪可以順利接埋發叔個立法會議席，真係變化萬千。因為鄉議局內仲有副主席張學明，而張學明本身係建仔中人，建仔係咪會咁順攤任由經民聯把持鄉議局議席呢？
至於金融服務界「肥老闆」張華峰，雖然業界地位崇高，呢幾年亦好落力協助業界，但佢今屆只係險勝對手李君豪六票，聽聞李君豪來年密謀翻盤，再加上新民黨張德熙有可能加入戰團，肥老闆要坐穩立會個位都唔係咁易。
經民聯唯一直選議員梁美芬，雖然每次選舉都獲「祝福」，但九龍西選區下屆增加一席，工聯會、民協同富貴黨都虎視眈眈，今屆梁美芬已經係末席當選，假如九龍西出現大混戰，對佢未必有利。至於地產建造界石禮謙，雖然佢嘅議席穩如泰山，但佢向來同經民聯關係「有名無實」，無論行事作風，似富貴黨多過經民聯，如果經民聯有多人落敗，樹倒猢猻散下，佢分分鐘轉投其他政黨懷抱。
下屆或要改名
反而最穩陣係工業界（一）梁君彥同工程界盧偉國，暫時睇唔到有強勁對手，業界亦無聲音要換人，預料兩人下屆有機會連任。心水清嘅人會記得，其實建制派之中嘅商界同專業界別，一向處於離離合合嘅鬆散狀態，由早年泛聯盟，再變成專業會議同經濟動力，之後又衍生出經民聯，到底下屆立會又使唔使再改名呢？
