鉛超標聞水色變 房屋署靠害街坊
上世紀六十年代制水，搞到有「樓下閂水喉」經典一幕，諗唔到今時今日仲有制水呢支歌仔唱，真係有時空錯亂、今夕何夕嘅感覺。冇錯，講緊嘅就係屋邨食水含鉛事件，搞到居民聞水色變，房屋署監管塞責，簡直靠害。
啟晴邨食水含鉛風波愈鬧愈大，房屋署最初仲口硬話食水冇問題，但好快就自打嘴巴，承認抽驗嘅水辦鉛超標，個別樣本甚至超標兩倍半添。補鑊措施一樣唔湯唔水，當局優先為六歲以下兒童、孕婦及授乳母親驗血及派水，被居民批評做法大細超。咁又係呀，大家都驚中鉛毒，有乜理由唔係一視同仁喎。
咁都未算，房屋署除咗公布埋另外四個由同一水喉匠負責施工嘅公屋名單，受影響居民高達五萬五千人，仲將水喉匠嘅大名公之於眾。當局突然咁有效率，係咪轉死性就未知，但就搞到人心惶惶，一片恐慌。而被指「元兇」嘅水喉匠更係大聲呼冤，強調自己淨係監管工程，而工程使用嘅物料事前均獲房屋署驗收，仲話有責任就會承擔，但冇理由「食死貓」喎。
到底真相如何，誰是誰非，仲要查過至知，但令人奇怪嘅係，官老爺成日攞保護個人私隱做擋箭牌，甚至已判過刑嘅孌童犯名字都諱莫如深，今次居然咁爽快將「嫌疑犯」開名，既不公平，更不正常，如果話房屋署唔係想乘機推卸責任，尋找替罪羔羊，真係講都冇人信咯。
點講都好，今次事件房屋署根本無可抵賴，責無旁貸。好簡單，房屋署負責監管各公共屋邨，由招標、施工、落成、驗樓以至入伙都關佢哋嘅事，點可能乜都賴晒落水喉匠了事？再講吖，《水務設施條例》規定，持牌水喉匠施工時唔可以使用含鉛材料，如果有人違規施工，固然要承擔責任，但當局監管不嚴，咁都收貨，咪即係共犯。
家陣最令人擔心嘅係，除咗已公布嘅五個屋邨，到底仲有冇其他屋邨「中招」，真係好難講。港府成日話民生無小事，家陣涉及嘅係市民健康及公共衞生嘅大事，連特首都話必須徹查源頭及提出長遠解決方法，就睇事件點收科。
話時話，港府話明今後集中精力發展經濟、改善民生，點不知特首上京前就爆出一單民生大醜聞，簡直係為反對派送上彈藥，港府入面有冇無間道，一睇就知喇，叮！
