激進泛民主派嘅議員揚言喺立法會財務委員會就創新及科技局撥款申請「拉布」,而盛傳將會做局長嘅特首創新及科技諮詢委員會顧問楊偉雄,就密密落區出席活動,尋日就去咗熟悉資訊科技嘅立法會議員EQ葛珮帆新書發布會,仲同在場嘉賓有傾有講,認真識撈。大家可能對楊偉雄唔太熟悉,佢透露自己最鍾意打網球,仲會請教練陪打,每個禮拜都會打一至兩次,持之以恒,話咁樣先會冇咗個肚腩,事關男人最忌肚腩喎。

葛珮帆出新書,甚少露面嘅老公都有現身撐場。

洪為民(左起)、楊偉雄同港區人大代表吳秋北,嚟個肚腩大比併。

不過,同場嘅前海管理局香港事務首席聯絡官洪為民減肥就唔係咁成功喇,佢話之前好辛苦由最高二百零六磅減到一百九十八磅,但同個仔去完日本京板神一個星期,就升返上二百零三磅,因為應酬太多。發布會仲有多位政界人士出席,包括食物及衞生局副局長陳肇始、沙田區議員楊文銳,雖然鄉事派同建仔唔啱傾,但沙田鄉事委員會主席莫錦貴都有出席。

第一手消息請下載on.cc東網iPhone/iPad/Android/Windows Phone Apps