泛民主派經常濫用立法會資源,但仍死性不改,白鴿黨議員AV仁何俊仁尋日仲借用會議室畀外來人開選舉研討會,但唔係討論區議會或立法會選舉,竟然係傾同香港無關嘅台灣總統大選,納稅人血汗錢就係咁倒落鹹水海。

設計圖片及對白

豪裝總部唔借出

明年初就係台灣總統大選,AV仁尋日就借用立會會議室搞研討會,邀請台灣前立法委員、別號「爆料天王」嘅國民黨邱毅主講,分析台灣國民黨準總統候選人洪秀柱嘅選情。個半鐘頭研討會中,只有一兩條問題問到台灣民主化同香港嘅關係。如果咁都話同香港或議員職務有關,日後世界各國舉行選舉,議員都可以借間會議室搞研討會喇!至於AV仁除咗開首做介紹之外,成場都冇乜發言,只係陪坐,佢講到明唔想被人話佢借完場但自己就走咗去喎。

其實日前先講過白鴿黨用咗一百三十六萬元裝修喺太子嘅黨總部,又花六百七十萬元買入荔枝角區一個千幾呎嘅工廈單位做創意媒體部工作室,全部由黨內儲備金支付。花咗咁多錢裝修,點解唔安排有關研討會喺黨總部舉行呢?AV仁就解釋係「方便」,但佢唔係邀請研討會嘉賓嘅人,當有人通知佢話研討會搵唔到地方搞嘅時候,佢就做個順水人情借間房畀大家囉。嘩,難為佢咁都噏得出,既然咁順水人情,大家不妨問佢借間房嚟打麻雀啦!

AV仁仲死撐話,研討會有講台灣選舉對香港嘅影響,係大家關注嘅議題,認為喺立會搞都得喎。不過,工聯會立法會議員王國興就唔係咁睇喇,話立會會議室應該用作立會事務,而唔係做同香港以外冇關嘅嘢囉!

第一手消息請下載on.cc東網iPhone/iPad/Android/Windows Phone Apps