政壇：綠化帶建屋 波波試水溫
覓地建屋一向係現屆政府施政之中嘅重中之重，政府早前就提出要將部分綠化地帶改劃為建屋用途，但被環保人士反對。發展局局長「波波」陳茂波又再為釋放綠化地帶試水溫，尋日發表長達三千字嘅網誌，引用大量數據，希望市民可以客觀理解房屋問題嘅癥結，認清大局，唔好盲目一刀切去反對改劃綠化地帶做建屋用途，更加質疑利用司法程序加以阻延嘅人係別有他圖，痛斥有人喺土地供應工作上「拉布」，批評咁會令本港嘅房屋問題倒退，普羅巿民受害。
設計圖片及對白
現屆政府「追落後」
政府成日都話好多嘢都係土地供應問題，但有人質疑現屆政府三年以來不斷增加土地供應，但樓價仍然高企，甚至創新高，究竟不停增加土地供應係唔係可以解決問題呢？波波就解釋，土地供應與房屋嘅關係，就好似麵粉同麵包，轉化嘅過程係需要時間嘅。
波波提出自己對私人住宅市場嘅觀察，形容現屆政府其實係「追落後」，話政府努力之下，過去二十個月嘅一手樓成交已經大增，一手樓嘅實際呎價曾經比二手樓便宜，隨着近年嘅動工量上升，明年一手樓落成量會達到二萬個，比過去十年高七成，只要繼續增加土地供應，有望扭轉供求失衡。
佢最後提到，自己從小喺木屋區同廉租屋長大，理解市民喺居住問題上嘅壓力同焦慮，話古洞北/粉嶺北新發展區、東涌新巿鎮擴展、洪水橋新發展區、元朗南房屋用地等多個發展計劃，可以為市民提供十九萬個公私營房屋單位，預計可於二○二三年之後逐步落成。至於中短期方面，佢就話無魔術棒，但會繼續改劃合適用地作房屋用途，增加單位供應。
