空氣污染成殺手 烏煙瘴氣使人愁

有環保團體研究發現，今年上半年十五個一般及路邊監測站錄得嘅空氣污染物都超出世衞標準，如果按照香港大學嘅達理指數推算，今年上半年空氣污染造成逾一千一百人提前死亡，以及逾一百四十億元金錢損失，都咪話唔得人驚。

唔係講笑，空氣污染真係可以殺人，近年香港馬拉松賽事時不時搞出人命，咪就係因為空氣質素欠佳囉。雖然本月一日起實施泊岸轉油法例後，遠洋輪船喺本港泊岸後須轉用低硫柴油，葵涌監測站嘅二氧化硫濃度下跌，證明法例初見成效，但環保團體擔心呢啲成效隨時因為本地車輛增長而抵銷。

環保團體嘅擔心絕對唔係杞人憂天，港府搞環保一向雷大雨小，實在好難令人有信心。早喺前朝貪曾年代，當局就誓神劈願要換回藍天白雲，結果得個講字，藍天白雲愈叫愈走，連貪曾本人都淪為「氣候逃犯」。當局年前迫於公眾壓力，終於姍姍來遲推出空氣質素新指標，可惜同國際標準差天共地，連第三世界國家都不如，擺明敷衍民意。

表面上，本港各區二氧化硫濃度冇超標，其實當中有蠱惑，環保署瞞天過海，將二氧化硫二十四小時平均濃度標準定為每立方米一百二十五微克，遠遠比世衞嘅二十微克標準寬鬆，根本係掩人耳目，誤導市民。至於二氧化氮方面，大部分監測站亦分別超出世衞每立方米四十微克嘅標準，比新加坡及倫敦高出約一倍，證明本港減排幅度比其他城市緩慢。嗱，呢張就係港府減排嘅成績單，究竟合唔合格，連細路仔都識得打分喇。

事實勝於雄辯，無論當局點樣自定門檻，空氣質素不斷惡化係不爭嘅事實。前排一項全球宜居城市調查，香港排名三十三，比舊年暴跌十六位，連北京同印度嘅新德里都不如，其中一個主要原因就係空氣質素惡劣。唔怪得愈來愈多海外公司及員工傾向去新加坡發展，起碼人哋嘅空氣質素都好啲喇。

即係咁，改善空氣質素唔係一朝一夕嘅事，呢個道理係人都知，關鍵係必須持之以恒，經過長期努力至可以見到成效，如果港府繼續敷衍了事，搞環保好似做騷咁，香港都幾難見到青天，叮！