城中鏡：名人談讓座 反網絡公審 善行由心發
呢排喺社交網絡上不時有網民上載影片，批評喺公共交通工具上嘅人唔讓座畀有需要人士，惹嚟網民熱烈討論同公審。積極推動社會服務嘅願景基金會日前舉行成立五周年暨就職典禮晚宴，冧莊做主席嘅「清潔王子」Mickey甄韋喬覺得做善事或關心長者應該由心而發，用正面嘅方式感染身邊人效法，批評或公審只會帶嚟負能量，無濟於事。
甄韋喬（右二）冧莊做願景基金會主席，太太同兩個仔都去撐場。
願景基金會理事趙傑文（左）同副主席余嫿好支持青年以創意行善。
王嘉源（左起）、盧金榮同李海榮都認為做善事應以身作則。
盧金榮籲以身作則
Mickey話佢哋早前搞咗個叫「十面埋『服』」嘅社會創新服務大獎，就係希望鼓勵年輕人多花心思，運用個人技能同專業知識去幫助有需要嘅人。講起現時社交網路上不時出現有網民放影片公審喺交通工具上唔讓座嘅人，佢就話自己成日都會搭港鐵，但冇乜特別嘅話，就算有位佢都會企，反正車程唔係太耐，將座位讓畀有需要嘅人。
有兩個女兒嘅菁英會主席盧金榮亦相當支持該獎項計劃，講到關心社會文化，佢話長輩係小朋友學習榜樣，有次佢搭電車由天后去銅鑼灣，期間有兩位長者上車，一位女士見到就二話不說立即讓座，身旁嘅小朋友見狀亦隨即效法，起身讓埋自己個位畀另一位長者坐，令佢明白關心長者或做善事都係要以身作則，培育小朋友嘅關愛文化。
當晚捧場嘅仲有「洗樓王」創辦人王嘉源，講起網上出現俗稱「道德塔利班」嘅人將照片放在網上公審他人，佢坦言每個人都總會有做錯事或做得唔好嘅時候，冇人係永遠啱晒，例如拍攝者亦可以更主動即場提議有冇人可以讓座，比起過後放上網指摘更有貢獻。
