政壇：搞搞政：票債票償溫和泛民怕拉布

不過，白鴿黨、公文袋、工黨同其他泛民飯盒會成員都講明唔會發動「拉布」，支持盡快審議民生項目。睇嚟年底區議會選舉將至，令溫和泛民感受到票債票償壓力，唔敢再「拉布」阻礙民生！

白鴿黨議員單仲偕話佢哋會正常審議民生相關項目，但因為不滿政府暴力加會，會喺財委會審議創科局時唔會出席會議，又話如果參與「拉布」就會落入政治鬥爭陷阱。但有學者就批評該黨唔開會，係迴避議員嘅議事責任。同樣講明唔會參與「拉布」嘅工黨就正常啲，話會如常出席會議質詢政府，只係最後會投反對票。

不過，公文袋嘅講法算喺最模棱兩可，話要等創新及科技諮詢委員會主席楊偉雄回覆立會，下周會否出席會議先再作決定。至於會計界議員梁繼昌就一早講定，因為唔支持「拉布」，所以準備連會都唔開，仲喺下周離港，同十六歲囡囡去南歐四國旅行。

拉布四子廢提問礙民生

失去溫和泛民相助，「拉布」四子尋日仍喺財委會「拉布」，佢哋不停發問、提出休會待續動議等方式拖慢會議進度。社民連梁國雄啲問題最無厘頭，喺審議沙田濾水廠原地重置工程時，佢就問「沙田有無太陽，點解唔用太陽能」，好明顯係求其搵嘢問，毫無建設性。

人民力量早前要求將二十項工務工程分拆成十一項討論同表決，尋日六小時嘅財委會成功通過未被分拆嘅其中九項工程，同埋包括西九文化區綜合地庫同沙田濾水廠重置工程等五項工程撥款。如果泛民仲縱容「拉布」四子阻礙撥款，甚至口講唔「拉布」，但實際幫口不停提問，票債票償相信係泛民宿命。