政壇：阿Ann 啟晴邨抽水有玄機
民建聯（建仔）上屆派「新人」Ann蔣麗芸出選立法會九龍西直選議席，一舉成為該區票后。話咁快今年底就係區議會選舉，雖然建仔有一百三十二個區議員，但該黨中人話，九龍城區議會或有空缺，到時隨時要阿Ann親征喎。阿Ann呢幾日頻頻落啟晴邨「抽水」檢驗食水含鉛量，莫非同佢準備出戰該邨所屬嘅九龍城啟德北新選區有關？
有意參選區議會嘅候選人，理論上應該落晒區插旗，但據聞建仔有九龍城區議員考慮緊退休，一旦真係退下火線，就要諗接班人。有建仔中人屬意由年輕人接手，但擔心未必咁快上手，如果真係要保住議席，隨時要搵阿Ann頂住先，始終佢經驗多啲。
至於明年立法會選情，建仔中人就話曾鈺成、陳鑑林、譚耀宗、葉國謙同黃定光都準備退下火線，但一班中生代，好似阿Ann、鍾樹根同梁志祥起碼都會選多一屆，以老帶新喎。係咪咁擺棋就要拭目以待嘞！
警告大舊 鬧及家人無癮
講起阿Ann，相信大家有留意佢前日同人民力量議員「大舊」陳偉業喺立法會特首答問大會中嘅罵戰，大舊因為搬埋阿Ann父親蔣震出嚟講，搞到阿Ann大怒離開議事廳，仲反鬧大舊：「你估我唔知你老婆同個女做咩呀？」
阿Ann尋日話朝早食早餐時，鄭重警告大舊日後講咩無所謂，唔好搬屋企人出嚟講，話互相搬對方嘅屋企人出嚟講，大家都無癮。佢重申自己係和平愛好者，相信大舊係因為知道佢疼錫父親，所以故意批評以激嬲佢。至於係咪知道大舊妻女做乜？阿Ann就故作神秘話「有必要先講」，話父親九十幾歲唔睇報紙，相反大舊妻女影響大啲喎。
大舊就話各有各食早餐，冇理阿Ann講乜，重申前日言論並無侮辱性，意思指蔣震係愛國商人，反問阿Ann點解講佢妻女，要求佢澄清。大舊之後又自爆父親都係喺國民黨黃埔軍校畢業，兩個舅父都係國民黨員喎。
