霸住茅坑唔做事 立會懶蟲數不完

大家應該記得，反對派舊年玩突襲，拉大隊佔領財委會轄下工務同人事編制小組，並成功搶奪兩個小組嘅主席位置以及控制權。咪以為班政客咁好死，想攬多啲嘢嚟做，實情係借機玩拉布，癱瘓施政。搞搞震冇幫襯都算嘞，最離譜係有啲人報名時鬼咁踴躍，一到埋位開會就影都冇埋，結果咪搞到數人頭、流會不斷，大量議案大塞車咯。

嗱，好似人事編制小組咁，唔計健康欠佳嘅張國柱，懶蛇排行榜三甲分別係白鴿黨嘅黃碧雲、前公文袋湯家驊以及現公文袋郭榮鏗，其中黃碧雲出席率更低至兩成六。工務小組嘅情況亦唔好得幾多，好多反對派議員出席率唔夠一半，霸住茅坑唔做事，簡直吹脹。反對派成日話建制派議員點樣懶，點樣不務正業，其實烏鴉笑豬黑啫。

係人都知，香港立法會議員待遇好優厚，一個月袋九萬幾人工，加埋近二十萬津貼，分分鐘高過美國總統，竟然有會不開，有事唔做，你話係咪混帳透頂吖。冇符喇，「垃圾會」有名你叫，有人更打正旗號「有破壞無建設」，懶得就懶，蛇得就蛇，市民早就見怪不怪咯。特別係一啲法案委員會，唔少議員開頭係威係勢，頭一、兩次會議後唔係遲到早退就係乾脆甩底。鬼咩，呢班友加入純粹博上鏡，有鎂光燈喺度鬼咁興奮，見冇乜傳媒關注，咪閃得就閃囉。

不過咁，政客就算肯乖乖哋坐定定開會嘅，表現都唔慌好得去邊。零備課、零發言已經算好，爆粗、掟嘢、拉布、流會……沒有最亂，只有更亂。最可惡嘅係，部分政棍唯恐天下不亂，終日煽動民眾搞所謂抗爭，有啲甚至收埋黑金幫老闆做嘢攪亂香港，舊年非法佔領行動更將香港搞到雞毛鴨血，納稅人請着呢班倒米壽星，真係唔得佢死。

真係諗極都唔明，如果係普通打工仔，懶、廢、壞是但衰一瓣，老闆肯定炒無赦，無良政客三瓣全中偏偏有得留低，仲撈得風生水起添。香港就係咁荒謬，有乜法子唔烏煙瘴氣，七國咁亂吖，叮！