城中鏡：A股暴跌郭樹清懶理
尋日喺A股廢堆裏，忽然（目及）到「郭樹清」個名，就係做開中證監主席，忽然被調去空降山東做省長嗰位。佢今次接受內地傳媒專訪，被問到佢又做過Banker，又做過國家金融監管揸Fit人，點睇內地財富管理？佢劈頭就一句「不要忘記，我現在只是一個地方政府負責人」。聽落去，都感覺到郭樹清呢句好似頗為心涼咁。
郭樹清
記得一二年底，佢仲做緊中證監主席時，滬深股市又係連創新低，連2,000點大底都穿埋，股市有升自然就有跌，但內地股民唔慣咁睇，佢即刻做咗箭靶，為平息民怨，佢仲出嚟講咗「監管機構要對股市下跌承擔一定責任」，呢句說話幾咁有中國市場特色。
郭樹清係朱鎔基同王岐山嘅愛將，被形容為「有想法、有辦法」嘅金融人才，80年代時已經喺國務院搞開經濟改革，做過央行副行長、外匯管理局局長、建行董事長，一一年出任中證監主席，點知做唔夠兩年，就調咗去山東做地方諸侯。不過，塞翁失馬，焉知非福。睇住呢排A股水深火熱，郭樹清唔知有冇零舍覺得山東地方「涼浸浸」呢可？
