城中鏡：藝術起飛
多個大型藝術展覽於近年進駐香港，連帶好多公共交通設施、公共空間都擺放愈來愈多嘅藝術作品，其中啟用咗十七年嘅香港國際機場，尋日舉行「香港藝術、文化與音樂巡禮」揭幕禮，多幅大型藝術同音樂作品將喺機場展出及播放，見到倫敦奧運美術大展金牌得主Dominic林文傑亦在場，仲即席揮毫兼蒙眼大顯身手，吸引旅客觀賞。
蘇澤光（前排右七）同一眾嘉賓，於機場見證「香港藝術、文化與音樂巡禮」揭幕。
林文傑背後畫作，曾獲倫敦奧運美術大展金獎。
蔡崇力於機場演奏。
Dominic除咗發明「折光畫」外，仲係德州生物科技之父，成立過世界眼科組織，進行防盲治盲等工作，今次佢選擇擺放於機場一號客運大樓作品中，就有其獲獎作品《從長城到泰晤士河－擁抱世界》，描繪多個世界著名嘅建築，讓旅客未出發，眼睛已先遊覽世界。
蔡崇力倡置鋼琴供表演
尋日同場仲聚集咗一班音樂人，包括傑出鋼琴家兼指揮家蔡崇力、音樂人黎小田等。講起外國有機場放置咗一台鋼琴後，吸引旅客即興演奏，並被拍下演出過程，蔡崇力話都有同機場提議過，但鋼琴係大型木造樂器，因此要顧慮埋消防問題，不過相信有解決嘅方法。
至於上任個幾月嘅機場管理局主席蘇澤光，同行政總裁林天福亦齊齊現身支持，其中林天福聯同運輸及房屋局局長張炳良、機管局藝術及文化諮詢委員會主席馮婉眉參觀幾個展覽區。張炳良對一個用罐頭砌成嘅大嶼山天壇大佛感興趣，覺得啲罐頭有香港特色，而佢細個嘅年代食罐頭係好奢侈，佢亦好鍾意食豆豉鯪魚喎。
