政壇：搞搞政：醫科跳級制搶特尖兩位院長矛盾升溫

早前中大醫學院宣布推出「跳級制」，容許部分「尖子之中嘅尖子」直接入讀醫學學士二年級，變相將六年制嘅醫科課程縮短咗做五年。可以早一年畢業，做醫生搵真銀，自然吸引力大增，但此舉難免會惹來競爭對手港大醫學院不滿。就此，梁卓偉日前會見傳媒時爆料，話喺發畀一位私人朋友嘅電郵中，以「本是同根生，相煎何太急」嚟形容今次爭議，暗批中大醫學院藉「跳級制」向港大搶客。

醫委會把關定奪

事隔三日，陳家亮尋日喺社交網站終於出招，發表題為「學醫無捷徑」嘅文章，強調不論係本港定係海外嘅大學，素來都有容許成績特別優異嘅學生，豁免第一年基礎課程嘅某啲科目。最重要嘅係，即使醫科課程由六年減至五年，學生必須修讀嘅核心課程並冇少到，完全符合本地訓練醫學生嘅要求，根本唔存在「走捷徑」同「濃縮版」嘅問題，反指有人誤會咗佢哋嘅建議，「令我感到嘆息」。唔知佢係咪覺得梁卓偉誤會咗佢呢？

陳家亮嘅反駁好似好有道理，但「跳級制」最終搞唔搞得成，仲要過負責審核醫生執業資格嘅醫務委員會嗰關。醫委會主席劉允怡尋日首次開腔回應事件，形容有關問題關乎本港未來畢業醫生嘅水平，非常重要，醫委會有責任把關，雖然今次事出突然，醫委會已決定喺明日嘅會議加插議程，以討論事件，並會邀請兩大醫學院派代表出席解釋，言談間，似乎佢亦畀陳家亮嘅「創意」嚇親。

醫委會委員周伯展更強調讀書需要「循序漸進」而非「鬥快」，學生讀多一年大學，一定會成熟啲，似乎對「跳級制」好有保留。