政壇：堆填區「狙星」哪吒撲空
話說公文袋創黨成員湯家驊早前宣布辭去黨員同立法會議員職務，預料最快明年初會有新界東地方直選補選，外界預料當年以阻止擴建將軍澳堆填區一戰而成名嘅西貢區議員「哪吒」方國珊或會披甲上陣，佢尋日趁環保署帶中學生參觀堆填區時又再出招，諗住當面向環境局局長「星星」黃錦星遞交請願信，點知最終撲空收場，局方亦冇派員接收請願信，哪吒等人喺將軍澳堆填區閘口放低請願信後自行離去。
方國珊（中）等人諗住狙擊黃錦星，最終撲空收場。
據知唔係因為星星去咗法國同意大利外訪而「甩底」，環保署回覆話安排中學生參觀堆填區屬局方恒常活動，局長一般唔會出席。話時話，哪吒今次狙擊星星撲空，下次出擊時，或要明查暗訪，有確切消息先至好行事嘞！
