政壇：黃之鋒驚被拉阻遊日
學民思潮召集人黃之鋒緊張去日本多過被捕？話說國務院舊年六月公布《「一國兩制」在香港特別行政區的實踐白皮書》後，泛民不滿白皮書矮化香港高度自治，因此白皮書公布翌日，就拉隊去中聯辦外抗議，其後焚燒大型自製白皮書，事隔一年多時間，黃之鋒等人陸續收到電話「預約拘捕」，控以阻差辦公。
（互聯網圖片）
黃之鋒喺社交網站自爆辦理登機手續時，收到警方電話，直言三個「好驚」。（互聯網圖片）
黃之鋒尋日朝早喺香港赤鱲角機場打卡，話剛剛辦理登機手續時，收到警方電話，佢講笑話當時「真係好驚、好驚同好驚」，驚乜？原來係驚警方立即拉佢返差館，唔畀佢上飛機，去日本嘅機票民宿，就一鋪過報銷，而警方都通融畀佢下周一或二先去落口供，同埋接受起訴。
社民連副主席「阿銘」黃浩銘、學聯秘書長Nathan羅冠聰、人民力量立法會議員「大舊」陳偉業尋日都分別收到「預約拘捕」電話。阿銘話「我打不死的，愈戰愈強」；Nathan就話事隔一年先決定起訴，「不知好嬲定好笑」；大舊就話奇怪點解燒《基本法》唔告，反而燒《白皮書》就告喎。
