李敬恩話幫手打理家族生意，難免感到壓力，不過屋企上下都好支持佢。
打工仔有壓力，就連恒地主席李兆基「四叔」嘅外孫女Kristine李敬恩一樣有。尋日Kristine以恒地租務部助理總經理身份出席旗下商場開幕活動，提到幫手打理家族生意，難免感到壓力，不過屋企上下都好支持佢，仲有「袋錢」落佢袋添！
Kristine係四叔長女李佩雯同夫婿李寧嘅大女，「壓力一定有，不過公公（李兆基）、父母同舅父李家誠都畀好多支持我」，仲不時鼓勵同指點佢，佢話呢啲係正面壓力。
Kristine畢業後，做過iBank。咁佢加入恒地兩年幾，同打iBank工有乜唔同？佢話打理家族生意，會更加努力同上心。
今次翻新「KOLOUR元朗千色匯」商場係Kristine首次擔大旗之作，商場翻新後，舖位幾近全部租出，租金平均升約百分之三十五，人流亦增加四成。佢仲話「荃灣千色匯」商場亦改建當中，預計明年底完成，兩個項目合共斥逾二億三千萬元翻新。
Kristine依家工作咁忙，問佢有無拖友仔呢？佢笑話「唔方便透露」。
第一手消息請下載on.cc東網
