政壇：一舊雲掀抽「水」浪潮
白鴿黨立法會議員「一舊雲」黃碧雲前日公布驗出啟晴邨有食水樣本含鉛量超出世衞標準，房屋署堅持話驗完無超標，搞到雙方好似自說自話，不過其實一場抽水風暴暗中上演，建仔嘅Ann蔣麗芸、民協嘅社區主任等紛紛加入戰團，又去信要徹查事件，又要搞簽名行動，一時間全城關注啟晴邨一帶水質問題，究竟同今年十一月舉行嘅區議會選舉有冇關？答案不言而喻。
設計圖片及對白
一舊雲喺前日公布記者會，公布曾驗十三幢屋邨同私樓嘅食水之後，駭然發現啟晴邨有食水樣本含鉛量超出世衞標準，據聞有官場中人私下批評，一舊雲唔肯交代邊度抽水辦，質疑佢嘅抽驗方法準唔準。
起初一舊雲承認基於私隱問題，冇交代超標樣本係來自邊一戶畀相關部門，但前日傍晚已經交晒啲超標樣本嘅資料，包括嚟自邊一戶嘅地址、家庭資料同聯絡方式，再加上化驗所報告畀衞生防護中心，一舊雲仲反咬一口話，好想睇番房署個報告嘅結果同數據。
阿Ann發函查德朗邨
身為九龍西直選議員嘅一舊雲一抽抽起千重浪，引發另一名九西議員阿Ann喺社交網站話，事件已經引起部分居民恐慌，事關如室內水管有事，咁比啟晴邨遲半年入伙嘅德朗邨點解冇事？為此，佢已去信水務署同房署，已經要求徹查清楚事件。
民協位於啟晴邨同德朗邨嘅社區主任李庭豐亦加入戰團，聲稱發現有住戶嘅水龍頭內裏有大量疑似沙石同黑色粒狀物體，令居民關注食水同水龍頭質素問題。
一不離二，二不離三，九龍城區居民聯會啟晴邨總幹事梁婉婷都話關注，仲發起簽名活動，要求房署全面檢查，同搵出超標源頭，話時話，真係一係唔抽，一抽就有條路，而且有全城關注嘅效果嘞！
