劏房衞生環境差 皆因官場多垃圾

嗱，有政黨巡查全港各區衞生情況，發現至少七十六個衞生黑點，除咗後巷堆積廚餘、行人路被垃圾佔據等常見問題外，私人大廈公共空間非法棄置家具嘅情況亦日趨嚴重。點解搞成咁？原因係愈來愈多劏房進佔俗稱「Ｎ無大廈」嘅舊樓，呢類樓宇無法團、無管理、無維修、無保安，逐漸淪為住客嘅集體垃圾房，特別係劏房人口密集，不斷有住客遷出遷入，加上有人缺乏公德心，大廈嘅走廊、天井、天台等地方咪淪為隨意棄置家具嘅垃圾崗囉。

古詩有云，安得廣廈千萬間，大庇天下寒士俱歡顏。香港雖有劏房千萬間，但係居住環境惡劣成咁，住客即使有瓦遮頭都難展歡顏喇。咪以為垃圾問題好小事吖，正如政黨話齋，大廈公共空間積存大量垃圾唔止有礙觀瞻，而且影響衞生，甚至導致蚊患鼠患，隨時危及住客健康，問題可大可小。外國曾經有報告指出，貧民窟經常成為疫症肆虐嘅傳染源，如果上述衞生情況唔改善，港式貧民窟話唔定會淪為病疫溫床都似！

話時話，住屋問題日益嚴重，困擾劏房住客嘅又點止垃圾及衞生問題吖。早前有調查顯示，由於樓價高企，租金飆升，劏房家庭平均要用四成收入交租，比當局前年公布嘅兩成九仲要高，而人均居住面積不到五十平方呎，細咗足足二十平方呎，如果唔計一人家庭，更加小到只有二十幾平方呎，連轉身都難吖。劏房租金愈來愈高，面積愈來愈細，衞生愈來愈惡劣，無殼蝸牛生活愈來愈悲苦，唔怪得有人話劏房已經成為人間悲劇嘅舞台，自殺、火災、自甘墮落等悲慘故事不斷上演。

歸根究柢，劏房之所以遍地開花，問題不斷惡化，禍源係官場充斥垃圾。港府拓土無方，建屋慢過蝸牛，搞到私樓樓價租金高不可攀，公屋居屋供不應求，無殼蝸牛想唔住劏房都唔得啦。當然，最大嗰件官場垃圾係前特首曾蔭權爵士，佢貪腐成性，任內一味傍住富豪黐飲黐食，傾斜權貴，卒之一手種下房屋問題嘅禍根，市民真係多得佢唔少。所以話，貪曾唔落鑊，簡直冇天理吖，叮！