城中鏡：心善最美
台灣新北市八仙樂園粉塵爆炸慘劇，不幸有港人遭殃，香港灼傷互助會副主席張潤衡近日飛往當地慰問傷者，卻換來網民批評其貌醜，不應去嚇人。
張潤衡太太Rainbow（中）抱埋囝囝，祝契媽李麗娟（左）生日快樂。
蘇婉珊（中）上月底牛一，「契爺」高永文（右）與高太同佢補祝生日。
張潤衡飛往台灣慰問傷者。（資料圖片）
民政事務局前常任秘書長「媽打」李麗娟同食物及衞生局局長高永文，就開腔力撐契仔潤衡做得啱。高永文話：「外表是美是醜唔重要，最緊要係內心美善。」
為赴台灣，潤衡被迫甩底，未能出席前日媽打同八仙嶺山火另一幸存者Wendy蘇婉珊嘅生日聚餐。不過，潤衡太太Rainbow就帶埋兩歲幾嘅囝囝一齊代老公出席。見社交網站有人留言批評潤衡，Rainbow大表無奈，話百分百支持丈夫。
「過來人安慰有共鳴」
撐潤衡嘅，仲有契爺高永文，佢話：「一個人嘅外貌是否嚇人，各人有唔同睇法，但只要人有一顆善良的心，自然靚。」好似媽打咁，就算生日都不忘行善，將今年收到合共十萬元賀禮捐予慈善團體，自己仲再加碼捐多十萬元。
曾同潤衡一起捱過痛苦治療嘅Wendy，佩服戰友夠勇氣，佢認為以疤痕纍纍嘅面孔去探訪，並不嚇人，而以過來人經歷安慰患者，的確較有共鳴。好似佢當年燒傷後，經歷六年反覆治療同手術，傷痛不足為外人道。如今Wendy喺貿易公司擔任行政工作，又開網店賣韓國化妝品，勉勵事件中嘅傷者：「火災過後只要唔放棄，生活一樣可以改變。」
