水蛭生活在野外密林或水澗中,市民郊遊亦可能遇上。行山專家指出市民前往叢林地區,應該穿上長袖衣服及長褲,盡量減少身體外露地方,有需要時可採用防水蛭襪防範。倘若不幸被水蛭咬中,切勿即時拔走水蛭,應用食鹽或尿液灑在水蛭周圍,令其脫落。

水澗中或有水蛭生存。(資料圖片)

鍾建民稱,東南亞地區的密林存有不少水蛭,會沿腳爬上身體吸血。

港野外少見

「香港其實好少見水蛭,但係去馬來西亞、尼泊爾地區嘅密林,就多到得人驚。」行山專家鍾建民稱,東南亞地區密林存有不少水蛭,特別尼泊爾地區,每年七至八月雨季時,叢林間會出現大批水蛭,行山人士需要專業防水蛭襪應付。他解釋:「水蛭一般由腳爬上嚟,身上咩地方都可去到,試過除鞋除襪先見到隻水蛭喺度吸緊血,我哋要用防水蛭襪,好似鞋套咁,包住整隻鞋同小腿。」

鍾又指被水蛭吸啜時,切忌即時拔走。他回憶:「有次喺馬來西亞畀水蛭咬住膝頭,我即時將佢拔走,點知返香港後,膝頭出現腫塊,好似雞蛋咁大,醫生話拔走水蛭時,毒液留咗喺皮膚入面,所以發炎。」鍾提醒說,若不幸被水蛭吸血,可用驅水蛭藥水或鹽噴灑水蛭,必要時亦可使用尿液。

第一手消息請下載on.cc東網iPhone/iPad/Android/Windows Phone Apps