政壇：搞搞政：黃之鋒無力吸金賴泛民
前日嘅七一遊行人數創七年新低，拖累大部分參與團體嘅籌款數字急跌，雖然民陣等多個泛民主派團體先後死撐滿意遊行人數，或堅稱係佢哋意料之內，唯獨學民思潮召集人黃之鋒直認人數較預計更少，需要警惕，泛民要深切反省同檢討喎。喺政改方案表決後舉行嘅七一遊行，抗爭能量耗盡，加上缺乏單一清晰訴求，人數暴跌唔出奇，但黃之鋒對遊行數字咁感慨，唔通嫌棄學民今次「吸金力」大減？
（設計圖片及對白）
學民今年七一共籌到五十四萬元，對比泛民政黨吸金力絕不遜色，但對比學民舊年籌到一百三十一萬元，實際上係按年暴跌六成，以金額計，比籌款數字暴跌逾六成嘅社民連更傷。據知學民會址九月起會被業主加租，所以學民七一當日懶理食環署已拒絕團體喺怡和街部分路段設置街站，都要揀最旺場嘅路段總動員嗌咪搏命吸金，加埋黃之鋒日前同女友當街遇襲受傷，當日善款由朝到晚陸續有來。
不過，港人多年嚟都係有聚焦爭議先會走上街爭取，政改表決後市民出現疲態好正常，黃之鋒與其歸咎修改《基本法》呢個訴求爭取唔到社會共識而令遊行人數下跌，不如反省吓依家社會最需要乜嘢好過，而唔應該淨係着眼於籌款數字，否則令人覺得佢緊張籌款數字多過遊行原意，咁就唔怪得咁多團體落場擺檔爭飯食喇！至於民陣尋晚都埋完數，今年籌到二十四萬八千元，比去年少咗十九萬元，連學民嘅一半都冇。
