曾素麗
尋日網上瘋傳一張以白鴿黨沙田區議員鄭則文同靚女社區主任Yen曾素麗名義發出嘅宣傳單張，呼籲市民最遲要喺尋日截止前登記做選民，點知就將「截止」寫錯做「載止」，變成「７月２就載止啦！」政黨單張張冠李戴都唔係首次，自然逃唔過網民法眼，但有人肯主動認錯就寥寥可數。
宣傳單張「截變載」。
曾素麗主動罰抄認衰。
阿Yen其後喺社交網站主動留言，表示「對不起，我錯了，罰抄一百次」，然後附上一張相片，顯示佢喺紙上罰抄一百次「我以後唔會再寫錯個截字。」
阿Yen主動認錯又乖乖自動罰抄，楚楚可憐嘅舉措令網友留言急轉軚，安慰佢唔好唔開心，支持佢，有人仲問佢係咪真係抄咗咁多次。阿Yen留言話「童叟無欺」，保證以後唔會再寫錯字。阿Yen識得主動拆彈，又冧得掂一批網友，睇嚟真係錯有錯着。
第一手消息請下載on.cc東網
