政壇：曾鈺成自認「人蠢無藥醫」
喺建制派WhatsApp群組訊息外洩後，揭露立法會主席曾鈺成涉嫌違反中立原則，喺政改方案表決期間向建制派披露泛民主派嘅行動詳情，雖然曾鈺成已向建制同泛民道歉，但事件餘波未了。佢尋日再次喺電台自嘲係「戇居」同「人蠢無藥醫」，仲承認當日同建制派WhatsApp係唔應該，雖然「錯就係錯」，但佢覺得自己主持會議時無偏幫亦無唔公道，拒向市民道歉。
曾鈺成
估唔到曾鈺成一件「戇居」事，唔止令自己可能連主席都無得做，仲連累其他議員。今日內務委員會召開本立法年度最後一場會議，因為人民力量要喺內會向曾鈺成提不信任動議，加上白鴿黨胡志偉提出成立調查高鐵專責委員會，令到內會會議延長。緊接其後嘅財務委員會更加要順延到五時先可以開始，搞到去晚上十一點四十分先可以完會，連開九小時會議，對於尊貴議員嚟講真係好辛苦。
雖然曾鈺成自嘲「人蠢無藥醫」，但就透露唔做主席之後，將會籌組智庫，仲話已經有商界資金同有心有力嘅青年人會參與。究竟「蠢人」搞智庫可以做到啲咩呢？大家要拭目以待喇！
