政壇：大舊大想頭 公費朝聖
立法會財務委員會上星期先批出將軍澳海水化淡廠第一階段設計及建造工程撥款，人民力量議員「大舊」陳偉業即日就去信發展事務委員會主席謝偉銓，建議委員會搞番個考察團去以色列，視察當地嘅海水化淡技術，同了解當地政府推動海水化淡嘅政策喎。不過，議員外訪慣常都會順便遊覽當地，成日被批評用公帑遊埠，唔知今次班議員又會唔會提議「順便」暢遊聖城耶路撒冷、約旦河或加利利湖呢？
（設計圖片及對白）
大舊日前去信謝偉銓，指以色列氣候乾旱，但透過海水化淡技術提供當地八成家居食水，而且成本低廉，每立方米只係港元四蚊多啲，比香港向內地購買東江水每立方米成本要成九元更抵，希望借考察團協助港府制訂有效海水化淡政策。
舊年擬取經臨陣縮沙
理由固然好聽，但記得工商事務委員會舊年都計劃外訪以色列，向當地嘅創新及科技發展經驗取經，但保安局其後因應當地局勢緊張，向以色列發出黃色旅遊警示，唔少議員都因為咁臨陣縮沙，而黃色警示至今都未取消，大舊點解仲硬係要冒險呢？
我哋問過大舊，佢解釋唔少國家都有海水化淡技術，但以色列人口密集，同香港情況比較似，加上唔少議員都唔掌握呢方面知識，認為呢個考察團值得搞。佢仲話自己去過以色列，唔使為免費遊埠建議外訪，又話黃色警示只係「好輕微」，而且大家唔係去好耐，相信唔會有事。若果成團，佢希望最快聖誕、新年出發，趕唔切就等到明年復活節啦！不過，係咪去得成以色列仲有好多關要過，未咁快有定案。
