國泰藏污納垢 衞署助紂為虐
哲學家教落，內因係變化嘅根據，外因係變化嘅條件，外因通過內因起作用。照咁睇，國泰航空醜聞多多，固然係內部管理混亂造成，但政府部門監管馬虎，甚至隱瞞包庇，一樣難辭其咎嘅咋。
其他唔講，淨係講國泰航空十四架客機嘅食水含大腸菌群呢單醜聞吖，衞生署日前公布從機場供水站、水車及航機機艙採集嘅三十九個食水樣本嘅檢測結果，發現兩間地勤公司合共兩架水車有微量大腸菌群，已暫停使用涉事水車。表面睇，污染源頭係地勤公司，唔關國泰嘅事，但實際上係咪咁呢？
經過本報抽絲剝繭追查，終於發現其中有蠱惑。即係咁，一共採集咗三十九個食水樣本，衞生署只係交代咗其中三十五個，餘下四個樣本去咗邊？面對本報質詢，衞生署初時仲咿咿哦哦，顧左右而言他，直到瞞無可瞞，先至擠牙膏式承認四個「被失蹤」嘅樣本來自兩班涉事國泰客機，並無發現致病原，但又自爆其餘十二班涉事國泰客機嘅食水尚未完成化驗程序喎。
喂，國泰明明有十四架客機嘅食水出事，衞生署只係驗咗兩架客機咁大把，咁快就公布出事源頭來自兩間地勤公司嘅水車，你話咁做公唔公平呢？結果準唔準確呢？如果咁都唔係包庇國泰，到底乜嘢先叫包庇呢？立法會議員就講得啱嘞，衞生署選擇性公布檢測結果，好聽叫做隱瞞，唔好聽叫做誤導，簡直不可原諒，必須向公眾交代。
冇錯嘞，客機食水含菌量超標，後果可大可小，衞生署身為監管機構，唔係從乘客安全着想，盡快查清污染源頭，反而遮遮掩掩，簡直靠害。再講吖，國泰足足拖延半個月先至呈報，衞生署唔追究責任不特止，仲幫手隱瞞，有冇再荒謬啲吖？
所以話，國泰近年醜聞爆唔停，固然係自甘墮落，當局助紂為虐一樣有責任嘅咋。又好似航班延誤咁吖，有乘客四日內竟然三度遇上國泰延誤，可見延誤已成常態。港鐵延誤都要被當局罰款啦，國泰卻從未受罰，直頭雙重標準喇。
諗落都幾唏噓，國泰曾經享譽國際，多次奪取全球最佳航空公司桂冠，點知呢幾年中咗邪咁，服務插水，連一哥寶座都要拱手讓人。正如今日香港，牛鬼蛇神橫行霸道，搞到烏煙瘴氣，國泰嘅沉淪，只不過係成個社會嘅縮影咋，叮！
