城中鏡：新婚馮英倫努力「造人」
日前小登科嘅發展局局長政治助理Allen馮英倫工作至上，留待九月先飛美國Napa Valley度蜜月。不過講到「造人」，Allen明言好恨做爸爸，愈快愈好喎。新婚嘅Allen，沐浴喺幸福之中，尋日出席一個酒會講起愛妻，嘴角仲甜絲絲。佢話屋企多咗個伴，並無「同住難」問題，事關兩人夾到痹，雖然馮太Carrie不擅廚藝，無得玩「煮飯仔」，但Allen完全唔介意。
馮英倫（右）恨做爸爸，新婚幾日就同太太Carrie努力「造人」。（互聯網圖片）
Allen又話揀去Napa Valley度蜜月，係遷就做紅酒生意嘅Carrie順道參觀酒莊，又話姑姐都喺當地生活，應該好恨見到呢位馮家新成員喎。一對新人好鍾意小朋友，渴望盡快造人成功，Allen仲話同佢年紀相若嘅兩位表哥已為人父，希望好快輪到佢。傳聞Allen讀書時，甚得女同學歡心，愛慕者眾，如今告別王老五生涯，唔知會唔會令一眾舊女同學心傷？
