城中鏡：希臘掃平樓
由於希臘拒絕向國際貨幣基金組織償還十五億歐元貸款，令全球金融市場震盪，日前港股就一度「股災式」暴跌逾千點，唔少股民嚇到腳軟。尋日喺沙田馬場見到一班政商界名人，佢哋都好關注事態發展。馬會大董、創興銀行副主席兼董事總經理Margaret梁高美懿就大派定心丸，話唔擔心港股會再受影響，事關港股依家受內地因素影響較多喎。
梁高美懿（右）同老公梁承達拍拖入馬場。
鍾國斌認為危機對港股影響唔大。
吳傑莊考慮去希臘買樓。
但Margaret希望希臘可以同國基會傾掂，唔使退出歐元區。佢又話歐洲唔少金融機構急住脫售希臘相關債券避險，幸好創興銀行冇持有相關債券，所以冇乜影響。
講到現時希臘唔少別墅豪宅都以「跳樓價」拋售，Margaret就話冇乜興趣買，皆因當地失業率高達百分之二十幾至三十，搵工同生活都唔容易。佢笑稱，去旅遊就冇所謂，但長住就咪搞！
鍾國斌倡入市港股
香港青年聯會常務副主席吳傑莊就有唔同睇法，佢話自舊年歐元持續下跌以來，希臘嘅投資移民門檻相對低咗，只要喺當地投資或買樓超過二十五萬歐元即可。佢有唔少朋友已喺當地購入好多物業，佢都覺得諗得過。
立法會紡織及製衣界議員鍾國斌亦係樂觀派，話今次希臘負債銀碼唔算大，之前冰島曾試過破產，相信國基會只係擔心放任希臘拖延債務，會有骨牌效應。日前港股大跌，已反映咗危機，依家入貨入得過喎。講就咁講，股民入市要小心就真。
